KA/Þór skellti Íslandsmeisturunum!

Frábær frammistaða í kvöld! (mynd: Þórir Tryggva)

Það var svo sannarlega búist við erfiðum leik í KA-Heimilinu í kvöld þegar KA/Þór tók á móti Íslandsmeisturum Fram í 7. umferð Olís deildar kvenna. Fyrir leikinn voru Framarar á toppnum og höfðu leikið ákaflega vel það sem af er tímabilinu. Á sama tíma var okkar lið fjórum stigum á eftir toppliðinu eftir flotta byrjun.

Leikurinn fór furðulega af stað, mikill hraði einkenndi upphafsmínúturnar og bæði lið gerðu sig sek um fjölmörg mistök. Gestirnir voru fyrri að laga sinn leik til og leiddu 1-3 eftir rúmar sex mínútna leik. En okkar lið er ekki beint þekkt fyrir að leggja árar í bát og í kjölfarið breyttist staðan í 5-3 þar sem gestirnir skoruðu ekki mark í tæpar 9 mínútur.

Áfram voru sveiflur í leiknum og var leikurinn hin mesta skemmtun fyrir þá sem lögðu leið sína á völlinn í kvöld. Framarar leiddu 9-10 er 10 mínútur lifðu af fyrri hálfleiknum en þá kom aftur magnaður kafli hjá okkar liði þar sem gestirnir skoruðu ekki í rúmar 8 mínútur. Hálfleikstölur því 13-11 fyrir KA/Þór.

Spilamennska liðsins var algjörlega til fyrirmyndar í fyrri hálfleik og forskotið sanngjarnt. Hinsvegar þá hefur komið slæmur kafli í leikjum liðsins í vetur og gegn jafn sterkum andstæðing og Fram þá má það ekki gerast til að vinna stig. Mönnum var því ekki rótt í hléinu þó staðan væri góð.

Það tók ekki langan tíma fyrir Íslandsmeistarana að jafna metin og var gríðarleg spenna í leiknum. Er kortér lifði leiks leiddu gestirnir 16-18 og í raun frábært hjá okkar liði að halda jafn vel í jafn sterkt lið og Fram hefur, það sást þó greinilega að stelpurnar ætluðu sér meira en að hanga í leiknum og með mikilli vinnu jöfnuðu þær metin.

Jafnt var á ölum tölum það sem eftir lifði leiksins og kviknaði heldur betur stemning í KA-Heimilinu. Hulda Bryndís Tryggvadóttir kom KA/Þór yfir í 23-22 og aðeins þrjár mínútur eftir af leiknum. Í kjölfarið vannst boltinn en dæmd var leiktöf á okkar lið í næstu sókn þannig að Framarar fengu aðra tilraun til að jafna metin.

Lena Margrét braust í gegn og jafnaði í 23-23 og Sólveig Lára Kristjánsdóttir fékk brottvísun. Það var ljóst að stelpurnar myndu ekki ná að hanga á boltanum út leiktímann og verandi manni færri var ýmislegt sem benti til þess að gestirnir myndu ná að klára leikinn.

Höndin fór upp en Martha Hermannsdóttir sem var frábær í dag gerði vel í að finna Önnu Þyrí Halldórsdóttur á línunni og hún skoraði rétt eins og í öllum öðrum færum sínum í kvöld en hún átti svakalega innkomu, skoraði 5 mörk og sótti 4 vítaköst.

Gestirnir áttu misheppnaða sendingu fram til að taka miðjuna og tíminn rann frá þeim og ótrúlegur 24-23 sigur KA/Þórs því staðreynd! Fögnuðurinn var gífurlegur enda stelpurnar að leggja besta lið landsins að velli og koma sér í frábæra stöðu þegar einn þriðji er búinn af deildinni.

Liðsframmistaðan skilaði þessum sigri í hús og var alveg sama hver var að spila, það skiluðu allar sínu. Martha og Sólveig Lára fóru fyrir magnaðri vörn og er ekki oft sem maður sér þetta lið Fram eiga í jafn miklum erfiðleikum með að finna opnanir eins og í leiknum í kvöld.

Sóknarlega gengu hlutirnir upp og niður en innkoma Önnu Þyrí á línuna skilaði gríðarlega miklu og var ótrúlegt að fylgjast með jafn ungri stelpu spila af jafn mikilli festu og raun bar vitni í þeirri erfiðu stöðu sem línustaðan er gegn fastri 6-0 vörn Íslandsmeistaranna.