Þór/KA sækir Val heim

Stelpurnar ætla að slá Val útúr toppbaráttunni!

Það er mikið álag á liði Þórs/KA þessa dagana en nú er farið að styttast í pásu í Pepsi deild kvenna vegna EM í Hollandi. Áður en kemur að þessari pásu á liðið hinsvegar tvo erfiða útileiki og sá fyrri er á morgun, þriðjudag.

Þá sækir liðið stórlið Vals heim en liði Vals var einmitt spáð Íslandsmeistaratitlinum fyrir sumarið. Þór/KA stelpurnar voru hinsvegar ekkert að virða það þegar liðin mættust í Boganum í fyrstu umferð deildarinnar og unnu góðan 1-0 sigur þar sem Sandra Mayor skoraði sigurmarkið góða.

Stelpurnar eru eins og allir ættu að vita á toppi deildarinnar með fullt hús stiga eða 27 stig. Á sama tíma eru Valsarar með 18 stig og þetta er því algjör úrslitaleikur fyrir lið Vals um að koma sér inn í toppbaráttuna eftir erfiða byrjun á sumrinu.

Á sunnudaginn á Þór/KA svo útileik gegn Breiðablik sem er einmitt í 2. sæti deildarinnar. Það er því mikið undir hjá okkar stelpum í þessum tveimur leikjum fyrir hlé enda gætu þær með góðum árangri algjörlega stungið af í toppbaráttunni eða með slöku gengi misst niður forskotið.

Við hvetjum því að sjálfsögðu alla sem geta til að mæta á Valsvöllinn á morgun klukkan 18:00 og styðja stelpurnar til sigurs. Þetta er einfaldlega einn mikilvægasti leikurinn í sumar, áfram Þór/KA!