Þór/KA mætir í Hafnarfjörðinn

Getur FH stoppað Þór/KA lestina? (mynd Sævar Geir)

Kvennalið Þórs/KA mætir í Hafnarfjörðinn á morgun, þriðjudag, og mætir þar liði FH á Kaplakrikavelli. Leikurinn er liður í 9. umferð deildarinnar og hefst klukkan 18:00.

Stelpurnar hafa byrjað mótið stórkostlega og eru á toppnum með 24 stig sem er einmitt fullt hús! Leikurinn á morgun er lokaleikurinn í fyrri umferð mótsins þannig að það er enn nóg eftir af mótinu. FH liðið er öflugt og situr í 6. sæti deildarinnar en FH tapaði naumlega gegn sterkum liðum Breiðabliks og Stjörnunnar.

Þór/KA vann frábæran 5-0 sigur á Grindavík í síðustu umferð þar sem Sandra María Jessen skoraði þrennu og lagði upp eitt mark. Sandra var valin leikmaður umferðarinnar og er greinilega komin í hörkuform. Á fimmtudaginn verður lokahópur landsliðsins valinn fyrir EM og verður mjög áhugavert að sjá hvort toppliðið okkar muni eiga fulltrúa í þeim hóp.

En það er virkilega gaman að segja frá því að leikurinn á morgun verður sýndur beint á Stöð 2 Sport þannig að þið sem komist ekki í Hafnarfjörðinn getið fylgst vel með gangi mála. Áfram Þór/KA!