Þór/KA grátlega nærri sigri gegn Selfoss
Nú rétt í þessu var leik Þór/KA og Selfoss að ljúka og lokatölur urðu 1-1 eftir að gestirnir náðu að jafna metin tveimur mínútum fyrir lok venjulegs leiktíma.
Þór/KA 1 - 1 Selfoss
1-0 Lillý Rut Hlynsdóttir ('16)
1-1 Guðmunda Brynja Óladóttir ('88)
Stelpurnar í Þór/KA náðu að skora úr sínu fyrsta alvöru færi og var þar á ferðinni Lillý Rut Hlynsdóttir eftir mikinn barning í teig Selfyssinga eftir hornspyrnu. Lillý gafst ekki upp og kom boltanum í netið og okkar stúlkur komnar yfir eftir rétt rúmt kortér.
Gestirnir sóttu í sig veðrið eftir markið og áttu nokkur ágætis færi án þess þó að skapa of mikla hættu.
Sandra María Jessen komst síðan í algjört dauðafæri á 38. mínútu þegar hún komst ein í gegn en Chante Sandiford í marki gestanna var vandanum vaxin, staðan var því 1-0 þegar flautað var til hálfleiks.
Ákaflega lítið markvert gerðist framan af síðari hálfleiknum en Selfossstúlkur reyndu hvað þær gátu til að jafna metin, það var þó ekki fyrr en á 75. mínútu sem þær fengu alvöru tækifæri á að jafna þegar Donna Kay Henry átti fínan sprett sem endaði með hörkuskoti í stöngina.
En það kom að því að pressa gestanna skilaði marki og það rétt fyrir leikslok, Guðmunda Brynja Óladóttir átti magnað skot rétt fyrir utan teiginn sem var alveg óverjandi fyrir Roxanne Barker í marki Þór/KA.
Okkar stúlkur gáfu svo allt í síðustu mínúturnar til að sækja öll stigin en það gekk ekki eftir og niðurstaðan því svekkjandi jafntefli eftir að liðið hafði leitt leikinn nær allan tímann.
Ekki tókst því að færast nær toppliðunum að þessu sinni en Þór/KA á þó enn leik til góða á önnur lið. Leikurinn í dag var ekkert merkilegur í raun og stelpurnar eiga mikið inni, það þurfti þó ekki mikið uppá í dag til að öll stigin hefðu komið í hús og því engin krísa hjá liðinu en eins og ég kom að fyrr þá geta þær svo sannarlega leikið betur, áfram Þór/KA!