Þór/KA fær Grindavík í heimsókn

Stelpurnar eru með fullt hús stiga á toppnum!

Kvennalið Þórs/KA fær Grindvíkinga í heimsókn á Þórsvöll á morgun, föstudag, klukkan 18:00. Stelpurnar eru á toppnum og það með fullt hús stiga eftir fyrstu 7 umferðirnar í deildinni. Liðið hefur nú þegar lagt stórlið að velli eins og Stjörnuna, Breiðablik og Val.

Mótherjarnir í Grindavík byrjuðu sterkt en þær náðu í 6 stig í fyrstu þremur leikjum sínum með sigrum gegn Haukum og KR. Hinsvegar hefur liðið ekki fengið stig síðan þá og er ljóst að liðið er hungrað í að koma sér aftur í gang. Það má reikna með erfiðum leik á morgun en okkar lið er staðráðið í að halda áfram þessu góða gengi.

Í sömu umferð mætast Stjarnan og Breiðablik sem eru einmitt liðin sem eru í öðru og þriðja sæti. Sigur á morgun gæti því aukið enn á forskotið á toppnum. Við hvetjum alla til að mæta á Þórsvöll og styðja stelpurnar til sigurs, áfram Þór/KA!