Lykilleikur hjá Þór/KA á Uppstigningardag

Tekst Þór/KA að halda áfram á sigurbraut?

Kvennalið Þórs/KA fær ÍBV í heimsókn á fimmtudaginn, uppstigningardag, klukkan 14:00. Stelpurnar hafa farið frábærlega af stað og eru með fullt hús stiga eftir 5 umferðir. Á sama tíma er lið ÍBV í 4. sæti deildarinnar með 10 stig og má búast við hörkuleik.

Um helgina vannst góður 0-2 útisigur á KR en eftir að staðan hafði verið markalaus að loknum fyrri hálfleik gáfu stelpurnar í og Anna Rakel Pétursdóttir kom liðinu yfir eftir hornspyrnu á 62. mínútu. Sandra Mayor innsiglaði svo sigurinn með marki á 81. mínútu eftir frábæra sendingu frá Söndru Maríu Jessen sem er greinilega öll að koma til eftir meiðslin.

Það hefur verið flott mæting á heimaleiki Þórs/KA og er um að gera að halda því áfram enda liðið á blússandi siglingu og leikurinn á fimmtudaginn mjög mikilvægur, sjáumst á Þórsvelli og áfram Þór/KA!