Jafntefli á Akranesi hjá Þór/KA

Kvennalið Þórs/KA sótti botnlið ÍA heim í gær í 11. umferð Pepsi deildar kvenna. Fyrir fram var reiknað með sigri okkar liðs en Þór/KA vann fyrri leik liðanna í sumar 4-0 og þá höfðu orðið breytingar á þjálfarateymi ÍA liðsins, annað kom þó á daginn.

ÍA 1 - 1 Þór/KA
0-1 Sandra Stephany Mayor Gutierrez ('25)
1-1 Megan Dunnigan ('59)

Leikurinn byrjaði frekar rólega en það var svo á 25. mínútu leiksins sem að Sandra Stephany skoraði fyrsta mark leiksins þegar hún kláraði vel eftir magnaðan skalla frá Söndru Maríu Jessen inn í teiginn. Staðan orðin 0-1 fyrir Þór/KA og eflaust flestir sem reiknuðu með þægilegum leik eftir markið.

Áfram var frekar rólegt yfir leiknum en Sandra María kom sér í gott færi undir lok fyrri hálfleiks en skot hennar var ekki nægilega gott og fór beint á Ástu Vigdísi í markinu.

Þór/KA ætlaði sér greinilega að klára leikinn og sótti stíft að Skagamarkinu í síðari hálfleiknum. Þegar um 10 mínútur voru búnar af hálfleiknum átti Andrea Mist tvö skot og Zaneta Wyne eitt í sömu sókninni en nauðvörn heimastúlkna hélt.

Stuttu síðar refsaði lið ÍA grimmilega þegar Megan Dunnigan fékk stungusendingu í gegnum vörnina og renndi hún boltanum í netið, staðan orðin 1-1.

Bæði lið leituðu að sigurmarkinu en það fannst ekki og jafntefli því niðurstaðan. Úrslitin mikil vonbrigði enda eru stelpurnar staðráðnar í að enda eins ofarlega í deildinni og hægt er. Skagaliðið á þó skilið mikið hrós en þær vörðust vel og voru hættulegar í skyndisóknum sínum.

Nú tekur við smá pása hjá Þór/KA en næsti leikur er 17. ágúst þegar Breiðablik kemur í heimsókn á Þórsvöll.