Góður sigur Þór/KA á Fylki

Sandra María skoraði fyrsta markið í gær

Kvennalið Þórs/KA sótti lið Fylkis heim í Pepsi deildinni í gær. Liðin mættust fyrir skömmu í Borgunarbikarnum þar sem Þór/KA vann 1-0 og var því reiknað með hörkuleik í Árbænum.

Fylkir 0 - 2 Þór/KA
0-1 Sandra María Jessen ('41)
0-2 Sandra Stephany Mayor Gutierrez ('78)

En stelpurnar okkar mættu vel stemmdar til leiks og voru miklu sterkari aðilinn í leiknum. Á 11. mínútu átti Sandra Mayor góða sendingu á Söndru Maríu sem lék á tvo varnarmenn heimastúlkna og kom sér í úrvalsfæri en missti á endanum boltann aðeins of langt frá sér.

Áfram leitaði lið Þór/KA að fyrsta marki leiksins og það kom stuttu fyrir hálfleikinn þegar Sandra Mayor kom með fyrirgjöf úr teignum sem fór rakleiðis á Söndru Maríu sem kláraði færið glæsilega og staðan orðin 0-1 sem voru hálfleikstölur.

Sama var uppi á teningnum í síðari hálfleik og var í raun eina spurningin hvenær næsta mark Þórs/KA kæmi. Það kom loks eftir laglega sókn þar sem Sandra Mayor komst ein gegn markverði Fylkis og kláraði af öryggi. Öruggur 0-2 sigur staðreynd og stelpurnar eru þá búnar að vinna tvo leiki í röð og vonandi að þær nái að halda áfram á sigurbraut.

Lið Þórs/KA átti samanlagt 18 marktilraunir í leiknum gegn 5 hjá Fylkisliðinu sem segir í raun alla söguna. Þessi sigur styrkir stöðu liðsins í 4. sæti deildarinnar þegar enn er ein umferð eftir af fyrri hluta tímabilsins.