Brynjar Ingi framlengir við KA um 3 ár
Brynjar Ingi Bjarnason varnarmaður KA hefur framlengt samning sínum við Knattspyrnudeild um þrjú ár. Brynjar Ingi hefur staðið sig frábærlega á undirbúningstímabilinu og lék meðal annars alla sex leiki KA í Lengjubikarnum, þá var hann nýverið valinn í æfingahóp U-21 árs landsliðs Íslands.
Brynjar lék á láni með Magna í Inkasso deildinni á síðustu leiktíð og hefur hann samtals leikið 18 leiki fyrir Magna í deild og bikar auk þess sem hann hefur leikið einn leik með Einherja. KA ætlast til mikils af Brynjari sem er uppalinn hjá félaginu og ljóst að mikil ábyrgð verður á hans herðum á komandi sumri.
Hasarinn í Pepsi Max deildinni hefst 27. apríl næstkomandi er KA sækir ÍA heim og er mikil spenna fyrir sumrinu. Stuðningsmannakvöld verður í KA-Heimilinu á mánudaginn kl. 20:00 og þá verður leikmannakynning 24. apríl, það er því næg dagskrá fyrir spennta KA menn fyrir fyrsta leik, áfram KA!