Umfjöllun: KA áfram í bikarnum eftir framlengingu

Almarr skoraði sigurmarkið / Mynd - Sævar Sig

KA lagði Tindastól í kvöld í 2. umferð Borgunarbikarsins eftir framlengingu 2-1. Staðan eftir venjulegan leiktíma var 1-1.

KA 2 – 1 Tindastóll

0 – 1 Ragnar Þór Gunnarsson (’64)
1 – 1 Orri Gústafsson (’65) Stoðsending: Baldvin
2 – 1 Almarr Ormarsson (‘108) Stoðsending: Ívar Örn

Lið KA:

Fannar, Baldvin, Kristján Freyr, Ívar Örn, Hilmar Trausti, Ólafur Aron, Halldór Hermann, Bjarki Þór, Pétur Heiðar, Hallgrímur Mar og Orri.

Bekkur:

Aron Dagur, Almarr, Davíð Rúnar, Alekasandar, Hrannar Björn, Áki og Archie.

Skiptingar:

Kristján Freyr út – Almarr inn (’61)
Bjarki Þór út – Hrannar Björn inn (’66)
Hallgrímur út – Áki inn (’91)

KA-menn gerðu 10 breytingar á byrjunarliðinu frá sigringum gegn Fram. Hallgrímur Mar tók við fyrirliðabandinu af Davíð sem tók sér sæti á bekknum.

Fyrstu 40 mínútur leiksins voru heldur tíðindalitlar og var það bara stangarskot Hallgríms Mars á 10. mínútu sem þótti til tíðinda.

Á 41. mínútu tókst Hilmari Trausta næstum því að skora beint úr hornspyrnu þar sem markverði Stólanna tókst að bjarga naumlega á línunni. En Hilmar fékk smávægilega hjálp frá vindinum.

Vindurinn sem KA-menn spiluðu gegn í fyrri hálfleik hafði mikil áhrif á nokkrar sendingar og skot leikmanna sem virkuðu oft kraftlaus. Þegar leið á leikinn breyttist vindáttinn og var sterkur hliðarvindur á völlinn sem gerð leikmönnum beggja liða erfitt fyrir.

Við lok venjulegs leiktíma í fyrri hálfleik gerðist ótrúlegur atburður. En þá varði Arnar Skúli leikmaður Tindastóls skot Halldórs Hermanns á marklínunni með hendinni augljóslega. Dómarar leiksins virtust hins vegar ekki sjá atvikið og dæmdu ekkert. En um klárt víti og rautt spjald var að ræða. Stuttlega eftir þetta var síðan flautað til hálfleiks.

Síðari hálfleikur hófst rólega og voru bæði lið lengi að fóta sig og ekki spilaður fallegur fótbolti á upphafsmínútunum.

Á 64. mínútu átti Hilmar Trausti slaka aukaspyrnu beint á leikmann Tindastóls sem gaf fyrir á Ragnar Þór Gunnarsson sem skoraði af stuttu færi og kom gestunum óvænt yfir. Algjörlega upp úr þurru og þvert gegn gangi leiksins.

KA voru hins vegar ekki lengi að jafna. Aðeins tæpum 20 sekúndum síðar átti Baldvin frábæra sendingu inn fyrir vörn gestanna og Orri Gústafsson kláraði þröngt færi lystilega vel og jafnaði metin.

KA hélt síðan áfram að sækja hart að marki gestanna en vantaði þó töluvert upp á hjá liðinu og voru gæði sendinga ekki nægilega góð og leikmenn Tindastóls börðust vel og gáfu ekki tommu eftir.

KA náðu ekki að skora sigurmarkið síðustu mínúturnar og vörðust Stólarnir vel í lokin og fór svo að gripið var til framlengingar.

Í framlengingunni kom Áki Sölvason inn fyrir Hallgrím í sínum fyrsta meistaraflokksleik fyrir KA. En Áki átti einmitt hættulegasta færi fyrri hálfleiks framlengingarinnar þegar að hann komst í ágætis færi en markvörður Tindastóls varði vel.

Í síðari hálfleik framlengingarinnar hélt pressan áfram frá KA og björguðu Stólarnir á línu af stuttu færi frá Orra Gústafs og hreinsuðu boltann frá marki. En Ívar Örn vann boltann út við hliðarlínu og gaf góða fyrirgjöf á Almarr sem skaut flottu utanfótarskoti framhjá markverði Stólanna og kom KA yfir á 108. mínútu framlengingarinnar.

Fátt markvert gerðist eftir það og lauk því leiknum með 2-1 sigri KA. Spilamennskan í dag ekki glæsileg og geta leikmenn gert miklu betur. En liðið komst áfram og það er í reynd það eina sem skiptir máli. Gaman var að sjá Áka Sölvason koma inn í framlengingunni en hann var að spila sinn fyrsta mótsleik fyrir KA en hann er fæddur árið 1999.

KA-maður leiksins: Ívar Örn Árnason (Var eins og klettur í miðverðinum hjá KA í dag og átti stoðsendinguna í sigurmarkinu.)

Næsti leikur KA er laugardaginn næstkomandi þegar að liðið sækir Hauka heim í 2. umferð Inkasso-deildarinnar í Hafnarfjörðinn. Leikurinn hefst kl. 17.15 og er á Ásvöllum. Við hvetjum alla sem hafa tök á að mæta á völlinn fyrir sunnan og styðja við bakið á liðinu. Áfram KA!