Ársskýrsla KA árið 2008

Tryggvi Gunnarsson fór yfir árið 2008 hjá Knattspyrnufélagi Akureyrar í afmælishófinu sem haldið var þann 11. janúar 2009. Við birtum annálinn í heild sinni hér á síðunni, hann tekinn saman af Tryggva Gunnarssyni með aðstoð félaga í aðalstjórn.

Árið 2008 var merkilegt ár í sögu KA.  Félagið varð 80 ára á árinu og var af því tilefni haldin eftirminnileg afmælishátíð.  Afmæliskaffi var á sjálfan afmælisdaginn 8. janúar og síðan var barnaball haldið á föstudegi og einnig unglingaball um kvöldið.  Daginn eftir  á laugardeginum var hátíðarkvöldverður og dansleikur í íþróttahúsinu.  Páll Óskar sá um fjörið á öllum þessum viðburðum og verður þetta lengi í minnum haft þar sem hittust gamlir félagar og fjöldi fólks var heiðraður fyrir vel unnin störf hjá félaginu.

Deildir félagsins hafa unnið af krafti á árinu og íþróttalegur árangur verið ágætur.

Knattspyrnudeild er stærsta deild félagsins og starfið þar blómlegt eins og áður.
Dean Martin var ráðinn þjálfari meistaraflokks KA í knattspyrnu haustið 2007 og síðastliðið keppnistímabil var því hans fyrsta með liðið. Það var strax ljóst að Dínó ætlaði ekki að taka KA-strákana neinum vettlingatökum og svitamyndunin var meiri en áður hefur sést á æfingum. En þetta skilaði líka fínum árangri og strákarnir voru í frábæru formi. Þegar upp var staðið skilaði allt púlið KA-liðinu í fjórða sæti 1.deildar og að sjálfsögðu er stefnan sett ofar næsta sumar.

Metfjöldi ungra knattspyrnukrakka æfði á KA-svæðinu sl. sumar og sérlega ánægjulegt var að sjá mikla fjölgun í kvennaflokkunum. Það unnust margir góðir sigrar en margir leikir töpuðust líka. Gangur mála á knattspyrnuvellinum er í takt við lífsklukkuna, stundum eru hæðir og stundum lægðir.

Ein af skemmtilegum nýjungum í knattspyrnunni á KA-svæðinu var Knattspyrnuskóli Grétars Rafns Steinssonar í júníbyrjun þar sem þjálfarar frá Bolton Wanderes kenndu ungum knattspyrnukrökkum í KA og frá fleiri félögum ýmsar knattspyrnukúnstir. Vonandi verður unnt að hafa slíkan skóla aftur hér á KA-svæðinu.

Og ekki má gleyma árlegu N1-móti KA í 5. flokki karla, sem tókst mjög vel, eins og endranær. Við skipulagningu og framkvæmd mótsins leggur stór og öflugur hópur KA-manna saman krafta sína og útkoman er félaginu til sóma.

Handknattleiksdeildin hefur verið án meistaraflokks undanfarin ár og því ekki verið eins mikið í eldlínunni og á árum áður þegar liðið var ávallt í fremstu röð.  Á árinu 2008 ber hæst árangur 4.fl. karla sem varð Deildarmeistari síðastliðið vor og í öðru sæti á Íslandsmótinu.

Þar sem fyrirmyndirnar úr meistaraflokki vantar hafði orðið fækkun hjá yngri iðkendum  undanfarin ár en nú í haust fylltust skyndilega allar æfingar af efnilegum handbolta strákum og stelpum og má það að miklu þakka silfurmedalíu íslenska landsliðsins í Peking í sumar.  Fyrirmyndirnar eru greinilega mikilvægar.

Annað sem gleður KA hjartað er að meistaraflokkur og unglingaflokkur kvenna fóru aftur að leika í gulu og bláu búningum KA og ætlunin er að gera stelpunum hærra undir höfði en áður.  Meistaflokkurinn var taplaus á síðasta ári og keppir bráðlega í 8 liða úrslitum bikarkeppninnar.

Einnig er gleðilegt að gamlir leikmenn og þjálfarar eins og Jóhannes Bjarnason, Sævar Árnason, Einvarður Jóhannsson og Jóhann G. Jóhannsson hafa aftur komið til starfa við að byggja upp ungviði félagsins.  Það er því bjart yfir handboltadeildinni í upphafi nýs árs.

Blakdeild KA tefldi fram sterku karlaliði tímabilið 2007-2008 og liðið virtist um tíma ósigrandi í byrjun árs. Þeir unnu 31 hrinu í röð sem er líklega met hjá félaginu. Liðið endaði í öðru sæti í deildarkeppninni sem er besti árangur liðsins í áraraðir.  KA menn spiluðu til úrslita um Bikarmeistaratitilinn en töpuðu í gríðarlegum baráttuleik.  Sem stendur er karlaliðið í 2. sæti deildarinnar.

Ákveðið var að senda kvennaliðið ekki í 1. deild  spenna bogann ekki of hátt en huga þessi í stað að uppbyggingu yngri leikmanna en meistaraflokkurinn samanstendur að mestu af leikmönnum úr 2. og 3. flokki félagsins.

Það fór þó ekki svo að KA ynni ekki veglega titla á árinu 2008. Íslandsmeistaratitlar unnust í öðrum flokki karla, í þriðja flokki kvenna og í 5. flokki karla sem er besti árangur sem Blakdeild KA hefur náð í yngriflokkum fyrr og síðar  og gefur til kynna bjarta framtíð í blakinu hér á Akureyri.

Blakdeild KA tók  í september að sér framkvæmd  NEVZA sem er arftaki Norðurlandamóta undir 19 ára. Mótið var eitt stærsta verkefni sem Blakdeild KA hefur tekið að sér en keppendur á mótinu voru um 120 talsins í 10 liðum frá 6 þjóðlöndum í karla- og kvennaflokki.

Starf júdódeildar var með svipuðu sniði og undanfarin ár.  Í mars var keppt á Íslandsmóti barna og unglinga og urðu Astrid Maria Stefánsdóttir, Gunnar Örn Stephensen, Arnór Þorri Þorsteinsson, Karl Stefánsson, Steinar Eyþór Valsson, Helga Hansdóttir og Bergþór Steinn Jónsson Íslandsmeistarar.
Í apríl  var keppt á Íslandsmóti fullorðinna.  Bestum árangri þar náði Ingþór Örn Valdimarsson sem vann bronsverðlaun bæði í opnum flokki og í -90kg.  Eyjólfur Guðjónsson vann einnig bronsverðlaun í sínum flokki, -66kg.

Í október tókum við þátt í fyrsta Íslandsmótinu í Jiu-jitsu.  Bestum árangri þar náði Ingþór Örn Valdimarsson sem vann silfurverðlaun bæði í opnum flokki og í -90kg.

Í desember var haldið Akureyrarmót fullorðinna í fyrsta sinn í mörg ár.  Keppt var í einum flokki kvenna og sigraði Helga Hansdóttir þar.  Í karlaflokki var keppt í tveimur flokkum og sigraði Hans Rúnar Snorrason, faðir Helgu,  í -80kg en Ingþór Örn Valdimarsson sigraði í +80kg.

Þegar farið er er yfir starf deildanna sést vel hve mikið er í gangi.  Þetta segir okkur auðvitað að í kringum allt starfið eru fjölmargir sem koma að starfinu með einum eða öðrum hætti.  Íþróttafólkið er í eldlínunni en á bak við eru áhugasamir foreldrar, vinir og vandamenn sem sinna störfum sem gera þetta félag svona öflugt.  Þeirra starf ber að þakka og efla.

Gott dæmi um öflugan stuðning við félagið er ótrúlegur fjárstuðningur Samherja til íþróttamála á Akureyri.  Þar fékk KA 10 milljóna styrk til barna og unglingastarfs.

Íþróttum fylgja sigrar og töp, gleði og sorgir og því síðastnefnda kynntumst við í lok síðasta árs þegar fyrrum formaður félagsins Haraldur Sigurðsson lést eftir erfið veikindi.  Haraldar verður minnst um ókomna tíð innan KA.

Ég hvet alla KA menn til að taka þátt í því frábæra starfi sem fer fram innan félagsins og fylgjast með því sem fram fer í félaginu. Hægt er að nálgast upplýsingar á heimasíðu félagsins eða með því að kíkja í kaffi í KA heimilinu.  Þangað er fólk alltaf velkomið.
Að lokum óskum við KA til hamingju með 81 árs afmælið og vonum að árið 2009 verði gott KA ár.