Getraunastarf KA hefst að nýju

KA-menn eru að endurvekja getraunastarf sitt sem var með miklum blóma fyrir nokkrum árum. Alla laugardaga sem eftir eru til vorsins eru tipparar velkomnir í KA heimilið, í fyrsta skipti, laugardaginn 1. apríl, frá klukkan 11 til 13.

Við ætlum að byrja þetta af krafti og vera með tvo hópleiki fyrir síðustu 8 vikurnar í enska boltanum. Einnig ætlum við að bjóða öllum að vera „hluthafar“ í húskerfi félagsins.

Meira um hópleiki félagsins má lesa hér

Almennt um Getraunaþjónustu KA
Þegar þú tekur þátt í Getraunum eða Lengjunni geturðu styrkt KA með því að merkja við félagsnúmerið 600. Félagið fær þá hluta af sölulaununum, en þú getur bætt um betur með því að tippa beint hjá okkur í Getraunaþjónustu KA í stað þess að fara sjálf(ur) á netið eða út í sjoppu. Ef þú kemur til okkar eða sendir okkur raðirnar þínar fær félagið hærra hlutfall í sölulaun. 

Tvær leiðir
- Kaupa hlut í húskerfi Getraunaþjónustu KA, 600KA
- Tippa sjálf(ur) í eigin nafni

600KA – húskerfið 
Hluturinn í húskerfinu kostar 500 krónur, en þú getur keypt eins marga hluti og þú vilt. Þegar húskerfið vinnur skiptist vinningurinn hlutfallslega niður á þátttakendur (hluthafa) í húskerfinu þá vikuna. Þegar þú ert með í húskerfinu þarftu ekki einu sinni að hafa vit á fótbolta, þarft ekki að gera seðil sjálf(ur), heldur greiðir bara fyrir þinn hlut og "sérfræðingurinn" sér um að útbúa getraunaseðilinn.

Þrjár leiðir eru til að taka þátt í húskerfinu: 
1. Þú millifærir inn á reikning 600KA, 0302-26-8719, kt. 510991-1849 og sendir staðfestingarpóst á netfangið getraunir[at]ka.is.     
2. Þú greiðir með peningum í KA heimilinu á föstudags- eða laugardagsmorgni og kaupir þig inn í kerfið. Við erum í KA alla föstudaga og á laugardögum í um þrjá tíma fyrir lokun sölukerfis. Ef þú hittir ekki á getraunastjórann er hægt að hafa samband við starfsmann á vakt, fylla út skráningarblað og greiða fyrir hlutinn.
3. Þú notar aðgang þinn á 1x2.is, gerist meðlimur í hópnum 600KA og skráir kreditkortið þitt þar inni þannig að þátttakan í pottinum skuldfærist á það.

Vekjum athygli á að meðlimir í húskerfinu geta valið um það að vera með í hverri viku eða þá bara stundum eftir því sem hentar. Athugið að aðeins þeir sem eru með í viðkomandi viku eiga hlut í vinningi þeirrar viku. Ef þú ert tilbúin(n) að skuldbinda þig til að vera fastur hluthafi, vera með í hverri viku þangað til þú tilkynnir um annað, þarftu bara að hafa samband við getraunastjórann og ganga frá þeirri skráningu.       

Þitt eigið kerfi     
Þú getur tekið þátt beint sem einstaklingur eða stofnað hóp með vinum, vinnufélögum eða öðrum. Í boði eru yfirleitt þrír seðlar í viku (miðvikudaga, laugardaga, sunnudaga) og svo Lengjan alla daga vikunnar allt árið. 

Hvar, hvernig og hvenær er hægt að skila inn getraunaseðlum?
Getraunaseðla vikunnar má finna hér (1x2.is). Senda má inn seðil í getraunir[at]ka.is eða skila til getraunastjóra/starfsfólks í KA tímanlega fyrir lokun sölukerfis. Sölukerfið er opið til kl. 14 á laugardögum á vetrartíma, en til kl. 13 á sumartíma (klukkubreyting í lok mars og október). Getraunastjóri er yfirleitt á vakt í KA á föstudagsmorgnum kl. 9-15 og á laugardögum frá kl. 11 (oftast fyrr) og fram að lokun sölukerfis. 

Hvernig er hægt að greiða fyrir getraunaraðir?
Þægilegasta leiðin fyrir alla er að skrá inn kreditkort í gegnum aðgang þinn á 1x2.is þannig að þegar við setjum inn röð á þínu nafni þá skuldfærist kostnaðurinn beint á þitt kort.

Einnig má greiða með peningum/korti í KA eða millifæra á reikning 0302-26-8719, kt. 510991-1849 og endið staðfestingu í getraunir[at]ka.is.

Áminningarþjónusta 
Ef þú lætur okkur fá netfang og/eða gsm númer sendum við þér póst og/eða sms til að minna þig tímanlega á að tippa. 

Áheit 
Hefur þú áhuga á að heita á félagið eða einhverja af deildum þess og gefa ákveðið hlutfall af vinningi ef þú færð vinning? Hafðu samband við getraunastjóra og vilja þínum verður komið á blað.