Undanúrslit hjá Þór/KA/Hömrunum í dag

Mikið í húfi í dag hjá stelpunum okkar!

Þór/KA/Hamrarnir og Grótta/KR mætast í undanúrslitum Íslandsmótsins í 3. flokki kvenna í knattspyrnu klukkan 12:00 í Boganum í dag. Stelpurnar eru búnar að eiga frábært sumar og tryggðu sér á dögunum sæti í bikarúrslitunum.

Í hádeginu freista þær svo að komast einnig í úrslitin um Íslandsmeistaratitilinn. Stelpurnar urðu efstar í A-deildinni og mæta nú Gróttu/KR sem varð í efsta sæti í öðrum riðlinum í B-deildinni. Leikurinn í beinni á KA-TV fyrir þá sem ekki komast á völlinn.