Hörkuleikur framundan á Víkingsvelli í dag

KA sækir Víkinga heim klukkan 14:00 á Víkingsvöll í Pepsi Max deildinni í dag. Með mikilli baráttu er KA liðið búið að koma sér upp í 8. sæti deildarinnar og ætlar sér enn hærra en aðeins stigi ofar eru Skagamenn í 7. sætinu.

Heimamenn í Víking hafa hinsvegar sogast niður í 10. sæti deildarinnar og hafa ekki unnið í síðustu 10 leikjum sínum í deildinni. Fyrir leikinn er KA með 20 stig en Víkingar með 16. Hvorugt liðið fellur líklega úr deildinni og í raun bara spurning í hvaða sæti liðin hafa metnað að enda sumarið í nú þegar fimm umferðir eru eftir af tímabilinu.

Leikurinn verður í beinni útsendingu á Stöð 2 Sport fyrir þá sem ekki komast á völlinn, áfram KA!