Tilnefningar til íþróttafólks KA 2021
Fimm karlar og fimm konur eru tilnefnd til íþróttakarls og íþróttakonu KA fyrir árið 2021. Þetta er í annað sinn sem verðlaunin eru afhent hvoru kyni og er mikil ánægja með þá breytingu. Deildir félagsins tilnefndu aðila úr sínum röðum og verður valið kunngjört á 94 ára afmæli félagsins í byrjun janúar.
Tilnefningar til íþróttakonu KA árið 2021
Hekla Dís Pálsdóttir - Júdó
Hekla hóf aftur keppni á árinu eftir nokkurt hlé. Það var þó ekki að sjá á henni þar sem hún stóð sig afskaplega vel á öllum þeim mótum sem hún tók þátt í. Hekla átti sterkt Íslandsmeistaramót fullorðinna þar sem hún vann silfur í bæði sínum flokki og opnum flokki, sem er virkilega gott afrek. Hún keppti svo fyrir hönd Íslands á Opna Finnska meistaramótinu í Október. Hekla er ómissandi á hverju móti bæði sem keppandi og á hliðarlínunni fyrir aðra keppendur þar sem hún styður og hvetur af áfergju.
Karen María Sigurgeirsdóttir fótbolti
Karen María byrjaði árið á að vera valin í æfingahóp A-landsliðsins og í kjölfarið tók hún þátt í Kjarnafæðismótinu og Lengjubikarnum með Þór/KA. Í sumar spilaði hún alla leiki Þór/KA og var markahæsti leikmaður liðsins með 5 mörk. Eftir fimm tímabil með Þór/KA ákvað Karen María loks að skipta yfir í Breiðablik. Með Breiðablik tók hún þátt í riðlakeppni Meistaradeildar Evrópu og mætti þar stórliðunum Real Madrid, PSG og WFC Kharkiv.
Paula del Olmo Gómez - blak
Blakdeildin tilnefnir Paulu del Olmo Gomes sem íþróttakonu KA. Paula átti frábært tímabil síðasta vetur, þar náði hún að skora flest stig í Mizuno deildinn eða 351 stig einnig var hún ein af þeim efstu í móttöku og blokk stigum. Þetta gerir Paulu að besta alhliðar leikmanni deildarinnar. Á síðasta tímabili leiddi Paula lið KA í úrslita leik Kjörísbikarsins þar sem KA endaði í 2. sæti, eftir að hafa unnið alla titla árið áður. Paula náði einnig á árinu 3. sæti á Íslandsmótinu í strandblaki. Paula er einnig frábær fyrirmynd innan sem utan vallar sem hefur laðað að fjölda iðkenda síðustu ár.
Rakel Sara Elvarsdóttir handbolti
Rakel Sara Elvarsdóttir, aðeins 18 ára gömul, átti stórkostlegt tímabil með KA/Þór þegar hún og stöllur hennar lönduðu öllum fjórum stóru titlunum sem í boði eru, Íslands-, Bikar- og Deildarmeistarar ásamt því að verða meistarar meistaranna. Rakel vakti verðskuldaða athygli fyrir framgöngu sína inná vellinum í Olísdeildinni en hún skoraði meðal annars 11 mörk úr 12 skotum í úrslitaleik við Fram um deildarmeistaratitilinn og skoraði mörg mikilvæg mörk í úrslitakeppninni gegn ÍBV og Val. Rakel var valin efnilegasti leikmaður Olísdeildarinnar 2021 og var valin í fyrsta sinn í A-landsliðið núna í lok nóvember. Þá fór hún fyrir góðu liði U19 ára landsliðs Íslands á EM í Makedóníu í sumar.
Rut Jónsdóttir - handbolti
Rut Jónsdóttir er lykilleikmaður í meistaraliði KA/Þór sem er handhafi allra titla sem í boði eru á Íslandi í handknattleik kvenna. Hún var valin besti leikmaður Olísdeildar kvenna en Rut kom eins og stormsveipur inn í deildina eftir 12 ára atvinnumannaferil. Rut er ekki bara stórkostlegur leikmaður heldur lyftir hún samherjum sínum einnig upp á hærra plan og er heldur betur vel að verðlaununum komin. Ekki nóg með að vera valin besti leikmaðurinn á lokahófi HSÍ þá fékk hún einnig Sigríðarbikarinn auk þess að vera valin besti sóknarmaðurinn. Rut er lykilleikmaður í íslenska A-landsliðinu.
Tilnefningar til íþróttakarls KA árið 2021
Alexander Arnar Þórisson - blak
Blakdeildin tilnefnir Alexander Arnar Þórisson sem íþróttakarl KA. Alexander var einn af burðarstólpum KA liðsins á síðasta tímabili sem og fyrri ár. Alexander hefur unnið alla titla með KA sem í boði eru á Íslandi undanfarin ár. Á síðasta tímabili náði lið KA í úrslit um íslandmeistartitilinn en hafnaði í 2 sæti. Eftir tímabilið var Alexander valinn í lið ársins í stöðu miðju og hafði þar betur við marga góða leikmenn. Undanfarin ár hefur Alexander átt sæti í landsliði í íslands en engin verkefni hafa verið þar vegna Covid. En hann var valinn í æfingahóp fyrir komandi verkefni landsliðsins um áramótin.
Árni Bragi Eyjólfsson - handbolti
Árni Bragi Eyjólfsson var besti leikmaður KA tímabilið 2020-2021 í Olísdeild karla. Hann fór fyrir liðinu sem komst í fyrsta sinn í úrslitakeppni frá því að KA hóf að leika aftur handknattleik í karlaflokki. Þá var hann valinn besti leikmaður Olísdeildar karla en Árni Bragi átti stórbrotið tímabil og má með sanni segja að hann hafi hrifið hug og hjörtu KA-manna í vetur. Árni rakaði heldur betur til sín verðlaununum á lokahófi HSÍ en hann varð markakóngur deildarinnar, var valinn besti sóknarmaður, fékk Valdimarsbikarinn og uppskar Háttvísisverðlaun HSÍ.
Brynjar Ingi Bjarnason - fótbolti
Brynjar Ingi Bjarnason er tilnefndur af knattspyrnudeild KA til Íþróttamanns KA. Brynjar Ingi er aðeins 22 ára gamall miðvörður sem lék ellefu leiki fyrir KA í sumar í efstu deild karla. Frammistaða Brynjars Inga vakti heldur betur mikla athygli en hann er virkilega góður knattspyrnumaður sem sóknarmenn annarra liða óttast. Í júlí var Brynjar Ingi Bjarnason seldur frá KA til Lecce í ítölsku B-deildinni og þaðan til Norska stórliðsins Vålerenga.
Brynjar er fyrsti KA-maðurinn síðan Þorvaldur Örlygsson var seldur, sem er seldur beint frá KA í erlent lið. Auk þess var Brynjar Ingi valinn í A-landslið karla á árinu, þar sem hann fékk óvænt tækifæri en sýndi þar gríðarlega góða leiki og er búinn að vinna sér fast sæti í byrjunarliði landsliðsins með frábærum frammistöðum. Hann lék hvorki fleiri né færri en 10 A-landsliðsleiki á árinu og skoraði tvö mörk!
Gylfi Rúnar Edduson - Júdó
Gylfi færðist upp um aldurs og þyngdarflokk í byrjun árs og getur það oft tekið tíma að aðlagast því. Hann tók áskoruninni hins vegar fagnandi og komst á pall í öllum keppnum hérlendis, vann þar á meðal silfur á Íslandsmeistaramóti unglinga og gull á haustmóti JSÍ. Gylfi kláraði svo gott ár með að keppa fyrir hönd Íslands á opna Finnska meistaramótinu í Október. Ofan á góðan árangur er Gylfi gefandi iðkandi og bætir sig og aðra á hverri æfingu.
Steinþór Már Auðunsson - fótbolti
Steinþór Már Auðunsson er tilnefndur fyrir hönd knattspyrnudeildar KA til Íþróttakarls KA en Steinþór Már er markvörður, fæddur árið 1990. Steinþór kom í KA fyrir tímabilið og er saga hans hálfgerð öskubuskusaga. Steinþór er uppalinn í KA en spilaði með Magna, Völsung, Dalvík/Reyni og Þór á meistaraflokksárunum. Steinþór kom í KA fyrir tímabilið 2021 og var hugsaður sem varamarkvörður. Hinsvegar fer ekki alltaf allt eins og það á að fara og Steinþór hóf leik í marki KA í upphafi tímabils og stóð sig frábærlega, frá fyrsta leik til hins síðasta. Steinþór fékk mikið lof frá íslenskum fótboltasérfræðingum og var besti leikmaður KA sem rétt missti af þriðja sætinu í Pepsi-deildinni. KA endaði í fjórða sæti deildarinnar og fékk á sig næst fæst mörkin í deildinni, aðeins 20 mörk í 22 leikjum og var það Steinþóri oft að þakka.