Styrkur til kaupa á keppnistreyjum frá Norðurorku

Í sumar hlaut Unglingaráð handknattleiksdeildar styrk til kaupa á keppnistreyjum fyrir stúlkurnar í yngri flokkum KA/Þór frá Norðurorku.
Þetta var kærkomin viðbót við það góða starf sem hefur verið unnið í því að styrkja kvennahandboltann frá því að ákveðið var að sameina hann undir merkjum KA/Þór og framvegis munu stelpurnar keppa í sínum eigin búningum.

Stúlkunum í yngri flokkum KA/Þór fer sífellt fjölgandi og hafa flokkarnir í haust verið mjög fjölmennir. Búningarnir eru nú komnir í hús og hafa mælst vel fyrir. Þeir hlutu sína fyrstu prófraun í KA heimilinu í forkeppni 4. flokks um síðustu helgi þar sem stelpurnar tryggðu sér sæti í 1. deild í vetur.
Við þökkum Norðurorku fyrir þennan höfðinglega styrk.

Hér má sjá útdrátt úr fréttatilkynningu frá Norðurorku varðandi styrkveitinguna:

„Styrkjum Norðurorku hf. til samfélagsverkefna var úthlutað í dag fimmtudaginn 21. júní við athöfn í sal fyrirtækisins að Rangárvöllum á Akureyri.
Haustið 2011 ákvað stjórn Norðurorku hf. að fara í endurskoðun á ýmsum þáttum í stefnumótun félagsins og var einn þeirra styrkveitingar til samfélagsverkefna.
Samþykkt var stefna félagsins í styrkveitingum og þar með þau grundvallarsjónarmið sem líta skal til við styrkveitingar. Þáttur í nýju ferli var að auglýsa eftir umsóknum um styrki til samfélagsverkefna og leitast við að gera ferlið opnara og gegnsærra þannig að öllum gæfist kostur á að koma óskum sínum á framfæri við félagið.“

Í kjölfar þessarar vinnu voru síðan birtar auglýsingar um styrki Norðurorku til samfélagsverkefna. Um þetta sagði í frétt á heimasíðu félagsins að þessu tilefni:
„Veittir eru styrkir til menningar- og lista, íþrótta- og æskulýðsstarfs og góðgerðarmála. Markmið með styrkjum Norðurorku hf. er að styðja við sjálfsprottið starf, starfsemi frjálsra félagasamtaka og framtak einstaklinga sem stuðlar að farsælli þróun samfélagsins, lífsgæðum og fjölbreyttu mannlífi.“