Margt um að vera í handboltanum um helgina

Að þessu sinni á Akureyri útileik í Olís deildinni og er hann að þessu sinni gegn heimamönnum á Selfossi sem eru mættir til leiks í efstu deild á nýjan leik. Þjálfari Selfyssingar er okkur að góðu kunnur, Stefán Árnason (Stefánssonar) en Stefán lék upp yngri flokkana með KA og var jafnframt aðstoðarmaður á bekknum hjá Akureyrarliðinu tímabilið 2008-2009.

Stefán Árnason lét í sér heyra sem aðstoðarmaður þjálfara og uppskar hér gult spjald

Leikurinn hefst klukkan 15:00 á morgun, laugardag og verður væntanlega sýndur beint á vef Selfyssinga. Við munum setja link á útsendinguna á heimasíðu Akureyrar þannig að fylgstu með upplýsingum á síðunni á morgun.

Akureyrarliðið stendur frammi fyrir erfiðum meiðslum beggja aðalmarkvarða liðsins, Tomas Olason meiddist á hné í þarsíðasta leik og Bernharð Anton Jónsson varamarkvörður skaddaðist á auga í leik með 2. flokki um síðustu helgi. Hvorugur þeirra er leikhæfur í augnablikinu og því verður Arnar Fylkisson væntanlega í aðalmarkvarðarhlutverkinu í þessum leik.

Ungmennalið Akureyrar með heimaleik í 1. deild á sunnudaginn
Það eru Þróttarar sem koma til leiks gegn Ungmennaliðinu. Leikurinn átti upphaflega að vera í kvöld í Íþróttahöllinni en Höllin er undirlögð alla helgina vegna Norðlensku matarhátíðarinnar Local Food Festival þannig að sá leikur hefur verið færður yfir á sunnudag og hefst klukkan 15:00 í KA heimilinu.
Það er full ástæða til að hvetja stuðningsmenn til að koma og hvetja þessa upprennandi lykilmenn okkar í baráttunni. Það er frítt inn á leikinn.

Í mörg horn að líta hjá Akureyrsku handboltafólki
Annars er óhætt að segja að það sé nóg um að vera á öllum vígstöðvum hjá Akureyrsku handboltafólki um helgina, heima og heiman. Hér á eftir er yfirlit yfir leiki helgarinnar í tímaröð hjá Akureyri, Hömrunum, KA/Þór, KA og Þór:

Minnum síðan á heimaleik Akureyrar gegn Haukum á miðvikudaginn í næstu viku!
Leikmenn og stjórn Akureyrar Handboltafélags.