Jóhann Einarsson bestur hjá U-liðinu
Það má með sanni segja að nýliðinn handboltavetur hafi verið ansi farsæll hjá KA þar sem bæði KA og KA/Þór héldu sæti sínu í deild þeirra bestu og gott betur en það. Að auki vann ungmennalið KA sigur í 2. deild karla og strákarnir munu því leika í Grill-66 deildinni á næsta vetri.
Lokahóf ungmennaliðsins fór fram um helgina og þar var Jóhann Einarsson valinn besti leikmaður liðsins og Einar Birgir Stefánsson bjartasta vonin.
Jóhann stýrði sóknarleik KA U með mikilli prýði í vetur og var markahæsti leikmaður liðsins með 90 mörk í 14 leikjum. Með góðri frammistöðu með ungmennaliðinu tryggði hann sér stærra hlutverk í aðalliði KA þar sem hann gerði 13 mörk.
Einar Birgir fór mikinn á línunni sem og í vörn og sýndi miklar framfarir í vetur. Einar var í hóp hjá aðalliði KA í öllum leikjum vetrarins og var maður leiksins er KA lagði ÍBV á útivelli í vetur. Það er klárt að ef hann heldur áfram að leggja hart að sér þá getur hann náð ansi langt í handboltanum.
Við óskum strákunum til hamingju með verðlaunin og liðinu öllu til hamingju með frábæran árangur í vetur og verður gaman að sjá hvernig liðinu mun ganga í næst efstu deild á komandi vetri.