Grótta lagði KA á Norðlenska Greifamótinu

Norðlenska Greifamótið er komið af stað!

Norðlenska Greifamótið í handbolta hófst í dag þegar KA tók á móti Gróttu og Akureyri á móti Stjörnunni í karlaflokki. KA/Þór lék svo gegn Ungmennaliði KA/Þórs kvennamegin. Mótið fer skemmtilega af stað en í karlaflokki er leikið í tveimur riðlum, annar er leikinn í KA-Heimilinu og hinn í Höllinni.

Dagurinn hófst á innbyrðisviðureign KA/Þórs og KA/Þórs U, leikurinn var frekar jafn í upphafi og gáfu þær yngri ekkert eftir. En þegar leið á fyrri hálfleikinn sýndi eldra liðið mátt sinn og náði góðu forskoti. Þegar flautað var til hálfleiks var staðan 15-6 fyrir KA/Þór og mesta spennan farin úr leiknum.

Í þeim síðari tókst ungmennaliðinu að halda betur í við þær eldri og úr varð ágætis skemmtun. Lokatölur voru 25-15 en þetta var fyrsti æfingaleikur KA/Þórs fyrir veturinn og verður áhugavert að sjá til liðsins í næstu leikjum á mótinu.

Mörk KA/Þórs: Una Kara Vídalín 7, Martha Hermannsdóttir 6, Rakel Sara Elvarsdóttir 4, Hulda Tryggvadóttir 3, Ólöf Marín Hlynsdóttir 3 og Helga María Viðarsdóttir 2.

Mörk KA/Þórs U: Svala Svavarsdóttir 5, Anna Marý Jónsdóttir 5, Anna Þyrí Halldórsdóttir 3 og Kristín Jóhannsdóttir 2.

Það var öllu meiri spenna í karlaleik kvöldsins þegar Olísdeildarliðin KA og Grótta mættust. Töluverður hasar var í leiknum og mátti varla sjá að um æfingaleik væri að ræða. Jafnt var á nánast öllum tölum í fyrri hálfleik en KA leiddi lungann af hálfleiknum, staðan að honum loknum var 10-10 og allt í járnum.

KA byrjaði síðari hálfleikinn vel, komst tveimur mörkum yfir en svo kom mjög slakur kafli þar sem liðið skoraði ekki í 12 mínútur og gestirnir gengu á lagið. Gróttumenn komust mest 6 mörkum yfir áður en okkar lið komst loksins aftur á blað. Forskotið minnkaði jafnt og þétt en ekki tókst strákunum að jafna og gestirnir fóru að lokum með 24-25 sigur af hólmi.

Mörk KA: Allan Norðberg 6, Áki Egilsnes 5, Tarik Kasumovic 3, Dagur Gautason 2, Sigþór Gunnar Jónsson 2, Einar Birgir Stefánsson 2, Elfar Halldórsson 2, Jón Heiðar Sigurðsson 1 og Sigþór Árni Heimisson 1.

Mörk Gróttu: Jóhann Reynir 9, Sveinn Jose Rivera 3, Ágúst Emil 3, Sigfús Páll 3, Magnús Øder 2, Árni Benedikt 2, Vilhjálmur Geir 2 og Alexander Jón 1.

Á sama tíma fór fram leikur Akureyrar og Stjörnunnar í Íþróttahöllinni en það var opnunarleikur Riðils 2 sem er leikinn alfarið í Höllinni. Garðbæingar fóru á endanum með sigur 21-26 og eru því komnir í góða stöðu í riðlinum fyrir morgundaginn.

Plan morgundagsins má sjá hér fyrir neðan en frítt er á alla leiki mótsins auk þess sem allir leikir í KA-Heimilinu eru sýndir beint á KA-TV.