KA vann Stjörnuna aftur

KA-menn eru nú á toppnum í blakinu eftir tvo góða sigra á Stjörnunni um helgina. Á föstudagskvöld vann KA nokkuð öruggan 3-1 sigur og í dag endurtóku þeir leikinn þótt sigurinn hafi verið mun torsóttari.

 KA vann fyrstu hrinuna 25-23 eftir að hafa leitt allan tímann. Stjörnumenn voru líklegir til að taka hrinuna í lokin þegar KA gerði slatta af kjánalegum mistökum sem fengu Marek þjálfara til að rífa hár sitt og skegg í bræði. Smá dramatík og nokkuð hafarí í kringum dómgæsluna gerðu útslagið fyrir KA sem náði að landa naumum sigri.

Önnur hrina var hnífjöfn allan tímann og skiptust liðin á að hafa forustuna. KA-menn voru í ágætu stuði framan af en þegar leið á hrinuna virtust menn ekki getað höndlað spennuna almennilega og Stjarnan tók frumkvæðið. KA var lítið að gera en nokkur afdrifarík mistök í sóknarleik Stjörnunnar reddaði okkar mönnum stigum. Jafnt var á öllum tölum frá 18-18 upp í 23-23 en þá loks náði Stjarnan að skera sig frá KA og tapaðist hrinan því 23-25.

KA rankaði við sér í þriðju hrinunni og hafði yfir frá byrjun. Smá hökt kom á kafla en eftir stutt leikhlé komst liðið aftur á beinu brautina og vann að lokum örugglega 25-19.

Strákarnir fóru erfiðu leiðina til að klára leikinn. Þeir byrjuðu mjög illa í fjórðu hrinunni en smám saman náðu þeir Stjörnunni og tóku svo öll völd og komust í 24-20. Þá kom skelfilegur kafli og Stjarnan jafnaði 24-24. Piotr tók þá smass sem dældaði gólfið og Ulrich átti svo flotta blokk til að klára leikinn. 3-1 sigur því staðreynd og KA-menn taplausir á toppi deildarinnar.

Stig leikmanna (smass-blokk-uppgjöf):