Stelpurnar tóku Stjörnuna 3-1 í blakinu

Kvennalið KA fylgdi í fótspor karlanna og vann sinn leik gegn Stjörnunni. Eftir mikið basl í tveimur fyrstu hrinunum náði KA undirtökunum og vann að lokum öruggan 3-1 sigur. Hulda Elma Eysteinsdóttir bar liðið á herðum sér og tók málin í sínar hendur þegar á þurfti að halda. Hún skoraði 27 stig en Auður Anna var með 16 og Birna 14.

 

KA-Stjarnan  3-1      (28-26, 17-25, 25-16, 25-10)

KA byrjaði leikinn fremur illa og móttakan var alveg úti á túni. Aðeins Auður Anna virtist klár í átök á meðan aðrir lykilmenn voru hver öðrum slappari. Stjarnan leiddi 12-17 þegar Hulda Elma fór í uppgjafarreitinn og náði hún að snúa taflinu með eitruðum sendingum yfir netið. KA skoraði níu stig í röð og komst í 21-17. Ballið var hins vegar rétt að byrja enda liðið enn á hælunum. Stjarnan jafnaði í 21-21 en KA virtist ætla að hafa hrinuna í stöðunni 24-22. Svo fór þó ekki og staðan breyttist í 24-25. Smá neisti frá Birnu og mikilvægar reddingar frá varamönnum liðsins keyrðu hrinuna að lokum í gegn og KA mátti þakka fyrir 28-26 sigur.

Önnur hrinan byrjaði ágætlega hjá KA en í stöðunni 12-6 hreinlega hrundi leikur liðsins. Stjarnan skoraði tíu stig í röð og KA vaknaði upp við vondan draum í stöðunni 12-16. Enn var það móttakan sem brást og var eins og sumir leikmenn væru að spila með bundið fyrir augun. Stjarnan bætti svo bara í og vann að lokum 17-25.

Nú þótti Huldu nóg komið og hún ásamt Birnu drifu liðið áfram í næstu hrinum sem unnust mjög auðveldlega 25-16 og 25-10. Stjörnustúlkurnar virtust hreinlega sprungnar og því varð mótstaðan ekki mikil.

 

Nafn	Stig	S-B-U	Uppgjöf	Móttaka	Sókn	Blokk	Vörn
Hulda Elma	27	18-2-7	7-14-0	2-13-2	18-8-4	2-1-0	9
Auður Anna	16	13-1-2	2-9-2	0-0-0	13-6-7	1-3-0	4
Birna	14	9-3-2	2-15-0	9-11-1	9-7-3	3-5-1	9
Una	6	0-0-6	6-6-4	0-0-0	0-7-0	0-2-0	1
Alda Ólína	5	3-0-2	2-6-2	1-4-3	3-6-1	0-0-0	1
Harpa	1	0-1-0	0-11-1	1-2-0	0-3-0	1-1-0	5
Sesselja	0	0-0-0	0-0-0	6-3-1	0-0-0	0-0-0	5
Guðrún	0	0-1-0	0-3-3	0-0-0	0-0-0	0-0-0	1
Eva	0	0-2-0	0-0-0	0-0-0	0-0-0	0-0-0	0