KA með öruggan sigur á Stjörnunni í Garðabænum

KA gerði góða ferð í höfuðborgina um helgina.  KA lagði Þróttara í gær og tók svo lið Stjörnunnar í kennslustund í dag.  Stjarnan átti aldrei möguleika í leiknum og munaði mestu um að sterkustu leikmenn liðsins náðu sér engan veginn á strik.

 

KA sigraði lið Stjörnunnar örugglega 3-0 í dag og hefur einungis tapað einni hrinu í þremur leikjum það sem af er ári.  Eftir slakan leik í gær, sem þó skilaði öruggum sigri, kom lið KA geysisterkt til leiks og sýndu Stjörnumönnum sínar sterkustu hliðar.  Segja má að Stjarnan hafi aldrei átt möguleika í leiknum því tölurnar segja sína sögu.  Jafnræði var með liðunum framan af fyrstu hrinunni en KA seig fram úr þegar leið á og tók hrinuna örugglega 21-25.  Í annarri hrinu tók KA öll völd á vellinum og allir leikmenn liðsins voru að spila vel bæði sóknar- og varnarlega.  Að sama skapi voru Stjörnustrákar óvenju slappir.  Í lok hrinunnar reyndi þjálfari Stjörnunnar, Vignir Hlöðversson, að skipta út leikmönnum til að rugla leik KA en allt kom fyrir ekki og KA sigraði örugglega 16-25.  Kannski hefði þjálfarinn átt að fara sjálfur inn á enda öflugur blakmaður þar á ferð.  Stjarnan leiddi þriðju hrinuna frá upphafi en á lokametrunum fór ótrúlegur leikkafli um hönd þar sem lágvörn og sterk sókn skiluðu KA sigri 24-26.  Þess má geta að Þjóðverjinn sterki, Till Wohlrab, var fjarri góðu gamni í báðum leikjum KA um helgina og þegar hann kemur inn aftur, eftir óvenjulega langt jólafrí, verður erfitt fyrir önnur lið að skáka sterku liði KA.  Bestu leikmenn KA, í annars jöfnu liði, voru Piotr og Filip.  Piotr var stigahæstur með 24 stig og Davíð Búi var með 11.  Í liði Stjörnunnar voru skrítnar tölur á ferðinni en Róbert Hlöðversson skoraði 11 stig meðan Emil Gunnarsson, blakmaður ársins, náði sér engan veginn á strik og endaði með 7 stig í leiknum.