HK-KA - öruggt hjá KA strákunum

Móttakan var óaðfinnanleg með þá Davíð Búa og Árna Björnsson í aðalhlutverki og sóknin beitt þar sem Piotr Kempisty og tvíburarnir Kristján og Hafsteinn fóru illa með HK menn og hrinan endaði með öruggum sigri.  Í þriðju hrinu var gerð taktísk breyting á liði KA en Marek tók á það ráð að spila alla hrinuna með þrjá sóknarmenn fram við netið og tvo hlaupandi uppspilara.  Því hlutverki skiptu Davíð og Filip með sér með góðum árangri.  Valgeir Valgeirsson kom sterkur inn í lið KA í þriðju og síðustu hrinu leiksins og sýndi góða takta fram við netið.

Í heildina var KA liðið að spila nokkuð vel í leik sem var aldrei í hættu. Í liði HK var Brynjar Pétursson öflugastur.

Í seinni leik liðanna byrjaði KA mun betur en í þeim fyrri.  Liðið leiddi alla fyrstu hrinuna sem endaði 25-19.  Í byrjun annarar hrinu var Davíð Búa skipt út af vegna meiðsla sem hafa verið að hrjá kappann í allann vetur.  Eitthvað óöryggi tók sig upp í leik liðsins, móttakan var slök og gengu heimamenn á lagið og náðu góðri forystu.  Í stöðunni 17-14 sendi Marek Davíð aftur inn á til þess að koma skikk á leik sinna manna.  Þegar staðan var orðin 19-17 heimamönnum úr HK í vil fór Hilmar í uppgjafareitinn.  KA náði að skora síðustu sjö stig hrinunnar sem endaði eins og sú fyrsta 25-19.  Í þriðju hrinu byrjuðu heimamenn úr HK mjög vel og náðu góðri forystu 7-2.  Móttakan var út og suður hjá KA og lítið um sóknir af þeim sökum.  Í stöðunni 11-5 var Marek nóg boðið og skipti Davíð Búa inn á til að koma móttökunni í jafnvægi.  KA menn tóku loksins við sér með mikilli baráttu og náðu að landa sigri í hrinunni 25-23 og þar með leiknum.  Í liði KA voru Piotr og Hilmar stigahæstir með 19 og 10 stig en í liði HK var gamla kempan Karl Sigurðsson stigahæstur með 8 stig.

KA vann sinn ellefta leik í röð í deild og bikar án þess að tapa hrinu.  Var það mál manna að um félagsmet væri að ræða. KA liðið situr í 2. sæti 1. deildar karla með 33 stig en Stjarnan er á toppnum með 35 stig en á tvo leiki til góða. Þessi lið leika innbyrðis í lokaumferðunum helgina 28.-29. mars og má reikna með að spennan verði gríðarleg í lok deildarkeppninnar.  KA og Þróttur Reykjavík eru að bítast um annað sæti deildarinnar.  Þróttur er sem stendur í þriðja sæti með 29 stig en hefur verið að gefa eftir á lokametrunum.