KA - ÍR kl. 16:00 beint á KA-TV!

Áki og strákarnir ætla sér tvö stig í dag!

KA tekur á móti ÍR í 8. umferð Olísdeildar karla í KA-Heimilinu í dag klukkan 16:00 en fyrir leikinn er KA með 5 stig eftir sex leiki en ÍR er á botni deildarinnar án stiga en hefur rétt eins og KA spilað einum leik minna en flest liðin í deildinni.

ÍR-ingar áttu góðan leik gegn Stjörnunni í síðustu umferð og hefðu hæglega getað tekið stig úr þeim leik en rétt misstu af því undir lok leiks. Á sama tíma náðu strákarnir okkar að knýja fram ævintýralegt stig gegn FH í Kaplakrika þegar þeir jöfnuðu 31-31 eftir að hafa verið fjórum mörkum undir er rétt rúmar tvær mínútur lifðu leiks.

Deildin í ár er gríðarlega jöfn og spennandi og ljóst að hvert einasta stig mun telja ansi mikið þegar upp verður staðið í vor og því mikilvægt að strákarnir nýti heimavöllinn vel í dag og tryggi tvö stig.

Athugið að engir áhorfendur eru leyfðir á leik dagsins en leikurinn verður hinsvegar í beinni útsendingu á KA-TV og hvetjum við ykkur eindregið til að fylgjast vel með gangi mála, áfram KA!