KA og Höttur gera með sér samstarf

Knattspyrnudeild Hattar og Knattspyrnudeild KA hafa gert með sér samstarfssamning. Samningurinn hefur það að markmiði að efla starf beggja knattspyrnudeilda og auka samstarf félaganna.

Öllum iðkendum í yngri flokkum Hattar stendur til boða að mæta á æfingar hjá KA á meðan þeir dvelja á Akureyri yfir stutta stund. Það sama á við um iðkendur KA þegar þeir eru í heimsókn á Egilsstöðum. Sé áhugi hjá KA iðkendum að fara á æfingar hjá Hetti skal senda tölvupóst á André Solorzano yfirþjálfara yngri flokka hjá Hetti andre10msa@gmail.com til að fá upplýsingar um æfingar.

Samstarfið á einnig að efla félögin faglega þar sem þjálfarar fá aðgang að þjálfurum hjá hinu félaginu. Árlega munu þjálfarar á vegum KA fara til Egilsstaða og vera með æfingar fyrir afreksefni Hattar. Efnilegustu drengir Hattar í 3. flokki fá boð um að æfa með KA yfir stutta stund. Ef félögin eru sammála um að ef leikmaður sem hefur lokið grunnskóla hafi þau gæði að geta spilað í efstu deild innan fárra ára fær hann boð um að koma inn í afreksstarf KA. Ef samstarfið gengur vel verður það vonandi útvíkkað með Þór/KA sem sér um kvennastarfið á Akureyri frá 3. flokki.

Samstarfið handsöluðu þeir Aðalbjörn Hannesson yfirmaður knattspyrnumála hjá KA, Guðmundur Bj. Hafþórsson formaður rekstrarfélags Hattar og Sævar Pétursson framkvæmdarstjóri KA.