Stig gegn Fjölni

Mynd - Fotbolti.net

KA og Fjölnir gerðu í kvöld 2-2 jafntefli í fjörugum leik í Grafarvogi þar sem heimamenn í Fjölni komust í 2-0 í fyrri hálfleik.

Fjölnir 2 – 2 KA

1 – 0 Ingimundur Níels Óskarsson (’27)
2 – 0 Þórir Guðjónsson (’38)
2 – 1 Hallgrímur Mar Steingrímsson (’44) Stoðsending: Steinþór Freyr
2 – 2 Hrannar Björn Steingrímsson (’55) Stoðsending: Emil Lyng

Lið KA:

Rajko, Hrannar Björn, Vedran, Callum, Darko, Aleksandar, Almarr, Hallgrímur Mar, Steinþór Freyr, Emil Lyng og Ásgeir.

Bekkur:

Aron Dagur, Ólafur Aron, Elfar Árni, Davíð Rúnar, Daníel, Archange og Bjarki Þór.

Skiptingar:

Steinþór Freyr út – Archange inn (’70)
Ásgeir út – Elfar Árni inn (’77)
Hallgrímur Mar út - Davíð Rúnar inn ('94)

Töluvert jafnræði var með liðinum til að byrja með í kvöld og fór leikurinn heldur rólega af stað. KA var meira með boltann en hvorugu liðinu tókst að skapa sér mikið á fyrstu 25 mínútum leiksins. Það kom því eins og þruma úr heiðskýru lofti þegar að heimamenn í Fjölni komust yfir á 27. mínútu leiksins en þar var að verki Ingimundur Níels Óskarsson eftir sendingu frá Linus Olsson en þeir nýttur sér mistök í vörn KA og áttu laglegan samleik í teignum áður en Ingimundur Níels kláraði færið af stakri prýði. Heimamenn bættu svo við öðru marki rúmum tíu mínútum síðar en þá var aftur vandræðagangur í vörn KA sem leiddi til þess að boltinn var tekinn af Callum og gefin fyrir markið á Þóri Guðjónsson sem skallaði boltann í netið af stuttu færi í markið og jók forystuna í 2-0.

KA liðið virkaði afar slegið við seinna markið en virtist sem betur fer vakna almennilega til leiks við þá köldu staðreynd. Steinþór Freyr var skömmu seinna felldur niður rétt fyrir utan teig af varnarmanni Fjölnis og aukaspyrna réttilega dæmd. Þar kom fyrirliðinn Hallgrímur Mar á vettvang og þá var ekki að spyrja að leikslokum. Hallgrímur afgreiddi aukaspyrnuna í netið af miklu öryggi og kom KA aftur inn í leikinn. Staðan í hálfleik 2-1 Fjölni í vil.

KA liðið mætti mjög ákveðið til leiks í síðari hálfleik og var greinilegt að liðið ætlaði sér ekki að fara tómhent heim úr Grafarvoginum.

Eftir snarpa sókn heimamenna snéru KA menn vörn í sókn og geystust upp völlinn. Þar lauk sókninni með því að Emil Lyng framlengdi boltann til hægri á Hrannar Björn sem kom á ferðinni og þrumaði boltanum í netið fyrir utan teig alveg út við stöng, óverjandi fyrir Þórð í marki Fjölnis. Frábær skyndisókn hjá KA og magnað skot hjá Hrannari og staðan því orðin jöfn 2-2.

KA gerði atlögu að því að hirða stigin þrjú og komust ansi nálægt því þegar að Ásgeir skallaði í slá eftir fyrirgjöf frá Hallgrími Mar en inn vildi boltinn ekki og lokastaða leiksins því 2-2 þar sem KA hefði hæglega getað tekið stigin þrjú en kærkomið stig eftir að hafa lent 2-0 undir í fyrri hálfleik og enn og aftur sýnir liðið karakter að koma til baka úr erfiðri stöðu.

Nivea KA-maður leiksins: Hallgrímur Mar Steingrímsson (Var ógnandi sem fyrr í sóknarleiknum og skoraði gríðarlega mikilvægt mark þegar að hann minnkaði muninn rétt fyrir lok fyrri hálfleiks.)

Næsti leikur KA er af dýrari gerðinni en á mánudaginn næsta koma Stjörnumenn sem eru í öðru sæti deildarinnar í heimsókn. Hefst sá leikur kl. 18.00 og vonumst við til að sjá sem flesta KA menn mæta á þann leik. Áfram KA!