Jafntefli í svakalegum slag KA og Akureyrar

Jón Heiðar Sigurðsson skorar fyrir KA

Það var heldur betur rafmögnuð stemming í KA heimilinu í kvöld þegar fyrsti alvöru bæjarslagurinn í handbolta í ellefu ár fór fram. Klukkutíma fyrir leik var orðið þéttsetið í KA heimilinu og spennan í loftinu áþreifanleg. Ein breyting var á KA liðinu frá síðasta leik þar sem Heimir Örn Árnason kom inn í liðið eftir meiðsli.

Akureyrarliðið mætti með töluverðan liðsstyrk. Úkraínski hornamaðurinn Igor Kopyshynskyi var mættur til leiks en hann lék með Akureyri á síðasta tímabili, vinstri skyttan Arnar Jón Agnarsson, fyrrum KR ingur lék sinn fyrsta leik með liðinu auk þess sem þjálfarinn, Sverre Andreas Jakobsson tók þátt í leiknum.

Akureyrarliðið byrjaði leikinn betur og náði fjögurra marka forskoti 2-6 eftir þrettán mínútna leik. Patrekur Stefánsson og Karolis Stropus með tvö mörk hvor.  KA kom til baka og minnkaði muninn í tvö mörk 4-6 og seinna í eitt mark 8-9 en Akureyri hélt tveggja marka forskotinu fram að hálfleik en hálfleiksstaðan var 10-12, Akureyri í vil.

Eins og tölurnar bera með sér var varnarleikur beggja liða sterkur og markvarslan í góðu lagi.

Jóhann Einarsson sækir að Akureyrarmarkinu

Seinni hálfleikurinn hófst á svipuðum nótum, Akureyri skrefinu á undan og leiddi með tveim til þremur mörkum. Eftir tólf mínútna leik í seinni hálfleik kom Patrekur Akureyri í 12-15 og virtust gestirnir hafa örugg tök á leiknum. Andri Snær misnotaði tvö vítaköst í röð fyrir KA og útlitið ekki glæsilegt.  En í kjölfarið kom kom magnaður leikkafli, vörn og markvarsla small saman og með fjórum mörkum í röð náði KA forystunni í fyrsta sinn í leiknum, 16-15 og enn tíu mínútur eftir af leiknum.

Eftir átta mínútna markaþurrð braut Hafþór Vignisson loks ísinn fyrir Akureyri með jöfnunarmarki úr vítakasti. Dramatíkin var alls ráðandi það sem eftir var leiks, jafnt á öllum tölum en KA með frumkvæðið. Dagur Gautason og Jón Heiðar Sigurðsson létu til sín taka í sóknarleiknum auk þess sem Ólafur Jóhann Magnússon var öruggur á vítalínunni.

KA missti mann af velli þegar ein og hálf mínúta var til leiksloka og staðan 19-19. Dagur Gautason fór inn úr vinstra horninu og kom KA yfir en Hafþór Vignisson jafnaði í 20-20. KA fékk síðustu sókn leiksins en náði ekki að skora og jafntefli, 20-20 því niðurstaðan.

Dagur Gautason og Hafþór Már Vignisson skoruðu síðustu mörk leiksins

Það er óhætt að segja að leikurinn hafi verið frábær auglýsing fyrir handboltann á Akureyri, yfirtroðfullt hús og geggjuð stemming. Akureyrarliðið sterkari aðilinn í fyrri hálfleik en KA hins vegar betri aðilinn á lokakaflanum þannig að jafntefli líklega sanngjörn úrslit þegar upp var staðið.

Mörk KA: Dagur Gautason 4, Jón Heiðar Sigurðsson 4, Ólafur Jóhann Magnússon 4 (2 úr vítum), Elfar Halldórsson 3, Andri Snær Stefánsson 2 (bæði úr vítum), Jóhann Einarsson 2 og Sigþór Árni Heimisson 1 mark.
Jovan Kukobat stóð í markinu allan tímann og varði alls 11 skot, var sérstaklega öflugur í seinni hálfleiknum.

Mörk Akureyrar: Hafþór Már Vignisson 6, Patrekur Stefánsson 5, Brynjar Hólm Grétarsson 4, Friðrik Svavarsson 2, Karolis Stropus 2 og Igor Kopyshynskyi 1 mark.
Arnar Þór Fylkisson stóð vaktina í markinu og varði sömuleiðis 11 skot, þar af  tvö vítaköst.

Hér má sjá gang leiksins:

 

Jón Heiðar Sigurðsson var valinn maður KA liðsins og Arnar Þór Fylkisson maður Akureyrarliðsins.

Smelltu hér til að skoða myndir Þóris Tryggvasonar frá leiknum.

Eins og áður segir þá var þessi leikur frábær skemmtun fyrir alla þá tæpu 1.100 áhorfendur sem voru í húsinu auk þess sem staðfestar tölur frá YouTube segja að beina útsendingin á KA-TV hafi verið með með yfir 3.000 áhorf.  Hér er einmitt hægt að skoða fjölmargar myndir Þóris Tryggvasonar sem sýna stemminguna hjá áhorfendum.

Eins og áður segir var leikurinn í beinni útsendingu á KA-TV og hægt að horfa á leikinn aftur í spilaranum hér að neðan.