Sannfærandi sigur KA á Þrótti - myndir

Í kvöld tók KA á móti Þrótti í Grill 66 deild karla. Þróttarar hafa verið á þokkalegu skriði í deildinni og höfðu ekki tapað í síðustu fimm leikjum sínum, unnu t.d. góðan sex marka sigur á HK auk þess sem þeir voru hársbreidd frá því að slá Selfoss út úr bikarnum í síðustu viku. Það mátti því búast við hörkuleik í KA heimilinu í kvöld.

Leikurinn fór varfærnislega af stað og lítið skorað á upphafsmínútunum. Þróttur skoraði fyrsta mark leiksins og það var ekki fyrr en á tíundu mínútu sem KA komst yfir í leiknum, 3-2. Forskotið var lengst af þrjú til fjögur mörk en síðustu þrjú mörk hálfleiksins voru KA manna sem leiddu því með fimm mörkum í hálfleik, 15-10.

Sigþór Árni Heimisson lék ekki með liðinu í kvöld en hann er að jafna sig eftir þungt höfuðhögg sem hann fékk fyrir tæpri viku síðan. Í hans stað sáu  Heimir Árnason og Jón Heiðar Sigurðsson um leikstjórnendahlutverkið og skiluðu því afar vel.

Jón Heiðar átti góðan leik í kvöld.
Smelltu á myndina til að skoða myndir Þóris Tryggvasonar frá leiknum

KA náði sex marka forskoti í upphafi seinni hálfleiks og má segja að nánast allan hálfleikinn hafi munurinn verið ýmist 5 eða 6 mörk. Þróttarar náðu tvisvar að koma muninum niður í fjögur mörk en það stóð stutt og heimamenn náðu sínum sex marka mun jafnharðan.

Í stöðunni 25-19 hikstaði sóknarleikurinn í heilar átta mínútur en þökk sé öflugum varnarleik og markvörslu Jovans Kukubat að Þróttarar skoruðu aðeins tvö mörk á meðan. Á síðustu mínútu leiksins tókst loks að brjóta ísinn og með tveim mörkum á lokamínútunni var sex marka sigur innsiglaður, lokatölur 27-21.

Segja má að sigurinn hafi aldrei verið í hættu, KA liðið einfaldlega klassa betri aðilinn í leiknum. Dagur Gautason átti frábæran leik, skoraði átta mörk og vann boltann hvað eftir annað í vörninni. Það kom því ekki mikið á óvart að í lok leiks var Dagur valinn maður leiksins.

Maður leiksins með eitt af átta mörkum sínum.
Smelltu á myndina til að skoða myndir Þóris Tryggvasonar frá leiknum

Mörk KA: Dagur Gautason 8, Andri Snær Stefánsson 6, Áki Egilsnes 5, Jón Heiðar Sigurðsson 3, Daði Jónsson 1, Elfar Halldórsson 1, Heimir Örn Árnason 1, Ólafur Jóhann Magnússon 1 og Sigþór Gunnar Jónsson 1 mark.
Jovan Kukobat stóð fyrir sínu í markinu með u.þ.b. 16 varða bolta.

Mörk Þróttar: Alexander Már Egan 4, Aron Heiðar Guðmundsson 3, Aron Valur Jóhannsson 3, Magnús Öder Einarsson 3, Styrmir Sigurðarson 3, Ólafur Guðni Eiríksson 2, Sævar Ingi Eiðsson 2 og Viktor Jóhannsson 1 mark.
Markverðir Þróttar, Haukur Jónsson og Halldór Rúnarsson vörðu 13 skot.

Helstu tölfræðiatriði leiksins

Næsta verkefni KA liðsins er fimmtudaginn 22. febrúar þegar þeir taka á mói Hvíta Riddaranum klukkan 19:00 í KA heimilinu.
Við bendum áhugasömum á að Ungmennalið KA á mikilvægan leik gegn Fram U í 2. deild karla á morgun, laugardag. Sá leikur hefst klukkan 16:00 í KA heimilinu.

En leikur KA og Þróttar var sýndur beint á KA-TV og er hægt að horfa á leikinn í spilaranum hér að neðan.