Toppslagur í Mosfellsbænum í kvöld

Gígja og stelpurnar eru klárar í slaginn!

Það er stórleikur framundan í Mizunodeild kvenna í blaki í kvöld er KA sækir Aftureldingu heim klukkan 20:00. Þarna mætast liðin sem börðust um Deildarmeistaratitilinn á síðustu leiktíð þar sem KA hafði á endanum betur og má búast við hörkuleik!

Mosfellingar unnu hinsvegar fyrri viðureign liðanna á núverandi tímabili í KA-Heimilinu sem fór í oddahrinu. Leikurinn var stál í stál og mikil skemmtun og ljóst að okkar lið þarf að eiga sinn besta leik til að færast nær Aftureldingu í toppbaráttunni en KA liðið tapaði bæði gegn Aftureldingu og HK í haust og þarf því á sigri að halda.

Leikurinn verður í beinni á streymi Blaksambandsins á BLI.is, áfram KA!