Fríar tækniæfingar hjá handboltanum

Frábært framtak hjá handboltanum

Rétt eins og undanfarin ár verður unglingaráð KA í handbolta með sérhæfðar tækniæfingar í boði fyrir metnaðarfulla iðkendur sína. Áhersla er lögð á einstaklingsfærni svo sem skottækni, gabbhreyfingar og sendingartækni. Þetta er fjórða árið sem þessar æfingar eru í boði og hefur verið mikil ánægja með þessa viðbót í starfið.

Öllum iðkendum KA og KA/Þórs í þessum árgöngum stendur til boða að nýta sér æfingarnar endurgjaldslaust. Skráning á æfingarnar er í gegnum netfangið jonni@ka.is.

Markmiðið með þessum æfingum er að bjóða okkar iðkendum sem þess óska að æfa aukalega, þar sem unnið verður með að bæta skottækni, auka skilning og bæta getu maður á mann, jafnt í vörn og sókn.

Rétt eins og í fyrra verður svo boðið upp á æfingar sérstaklega út frá þeirri stöðu sem iðkendur leika og verða séræfingar fyrir markmenn.